هكذا يتم احتساب تكلفة "مشوارك" من مكان الى آخر

بعد ما ارتفع سعر صفيحة البنزين اليوم بشكل جنوني ووصل لل397 الف ليرة، وتراجع سعر صرف الدولار الى 20 الف و500 ليرة، تكلفة الانتقال بالسيارة تغيرت وارتفعت ايضا.
وبعملية حسابية استندنا لإجراءها على دراسة من الدولية للمعلومات، تبين انو الكيلومتر الواحد بيكلف 3155 ليرة لبنانية لسيارة متوسط استهلاكها 170 كلم بالصفيحة الواحدة، علما أن التكلفة بتزداد او بتنخفض بحسب طراز السيارة وقديش بتستلهك.
هيدي التكلفة توزعت على البنود التالية:
كلفة البنزين: 2,335 ليرة اللي بتمثل نسبة 72% من الكلفة الكاملة
كلفة الزيت والفلتر للمحرك: 90 ليرة
كلفة البطارية: 47 ليرة
كلفة الدواليب: 190 ليرة
كلفة البوجي: 37 ليرة
زيت الأتوماتيك: 23 ليرة
فرامل أمامية وخلفية: 130 ليرة
ماسحات للزجاج: 19 ليرة
رسوم الميكانيك: 9 ليرات
تأمين ضد الغير + تأمين الزامي: 250 ليرة
غسيل السيارة 6 مرات سنوياً: 25 ليرة

وتم تحديد كلفة استهلاك قطع السيارة بناء لمسافة بتقطعها سنوياً بمعدل 11 ألف كلم، وبناء لسعر صرف الدولار بـ 20,500 ليرة.
اذا، صار فيكن اليوم تحسبو تكلفة مشواركن بالعملية الحسابية التالية:
بتشوفو كم كيلومتر بدكن تقطعو وهيدا الشي صار سهل على GOOGLE MAPS
وبتحسبو عدد الكيلومترات اللي رح تقطعوهن ضرب 3155 ليرة.

فمثلاً من طرابلس إلى بيروت في 160 كيلومتر، يعني التكلفة ذهابا وإيابا ب 505 آلاف ليرة.
من بيروت إلى جونية ذهاباً وإياباً في 50 كيلومتر، يعني التكلفة بـ158 ألف ليرة.
من بيروت إلى صيدا ذهاباً وإياباً في 90 كيلومتر، يعني المشوار بيكلف 284 ألف ليرة.

هيدي التكلفة بلا ما نحسب الأعطال المفاجئة وبلا ما نحسب طبعا عجقات السير. ومتل ما دايما بيقولولكن حسبو خطواتكن، صار فينا نزيد عليها ونقلكن: حسبو مشاويركن.